1Ti 6 | MHL | STEP | Aria wi uuwow mua sesa marewa uuwimik nain wiena saria ekima wia opuk, opora me wia fienuk. Oko wi mua papako-ke naap wia urufap Mua Maneka unuma wiar samorami i Yeesus teeria sira yiar firekikuan.

1 Timothy 6

Wi uuwow mua opora-ke

1 Aria wi uuwow mua sesa marewa uuwimik nain wiena saria ekima wia opuk, opora me wia fienuk. Oko wi mua papako-ke naap wia urufap Mua Maneka unuma wiar samorami i Yeesus teeria sira yiar firekikuan. 2 Ne wi saria Yeesus teeria-pa wiar ikemik nain, wiena uuwow mua-ke feenap me wia mauk, “Aa, i aakisa teeria epaskun, naapeya yo uuwowa efa maakeya-na me miiminen, moram i unow onaiya Yeesus teeria-ke.” Naap me mauk, weetak. Wi kema feenap wuauk, “O Yeesus teeria-ke, yos pun kookaliyem. Yo mauwowa balisow onomamkun neeke maa eliwa aawinok.” Wi kema naap wuap uuwowa eliwa onuk.

Maa unowa aawowa opora-ke

Yo nefa maakem nain anane wia maakemi kema wia iikirowam-ike. 3 Ne mua eena sira oko nia maakemi yiena Maneka Yeesus Krais opora ne Mua Maneka era makena-ke me wiar naiya nain, feenap maiyem, oram maneka wame purupiya, o amis marewa, naap maiyem. Wi mua sira naap nain opora mufemi irakow opora onam-miawikuan. Naap onami wiam tuunikuan, wiam fookami wiam firekikuan, ne kema-pa wiam keker opikuan. 5 Wi sira makena me ookowa wiena ikiwos samora-pa opora imenap nain maemi opora wiam fi-fieniwkin opor makena wiar mesenalinon. Wieniw wadolalemi naap maikuan, “Mua Maneka sira-na maa muutitik yiar imenowa era-ke,” naap maikuan.

6 Makena, mua eena Mua Maneka sira wiar ookami feenap mainon-na, “Yo maa unowa pepek,” naap maemi maa oko kema me wuinon-na eliwa ikainon. 7 Moram i maa muutitik onaiya me imenaremik. Ne umemi pun naap, maa muutitik onaiya me ikiwiyen. 8 Naapeya i maa enowa, ne mia suuwowa pepek yiar ikainon-na eliw.

9 Wi mua maa unowa iinan-pa pokowa kema wuimik nain, wi akimowa-pa wakimik. Ne wiena kookalowa samo-samora ne momor sira nain-ke top iwowa saarik wia sakaker opap ikua. Naeya ikoka iiwawun samorarikuan. 10 Moram, maamuma kookalowa-pa sira samora unow akena imenariya. Wi mua papako maamuma senam akena kookalemi, Yeesus ookowa sira piipuap kema sirirowa unowa wiena wiam wiimik.

Eliw ikowa sira baliwep ookiyen

11 Ne Timoti, no Mua Maneka uuwow mua wiar ikon. Naapeya sira samora unowa nain ao-wuepe. Mua Maneka sira makena kakeniw wiar ookam-ike, opora wiar opowa, mua wia kemalowa sira, kekelka wia maakowa, ne kekanowa opap uuwam-ikowa, sira eliwa nain ookam-ike. 12 Wi mua karuowa akimimik naap, nos pun nena uuwowa naap akimami kekanep balisow akena uuwam-ike. Mua Maneka wiar ikok epa eliwa aawep anane eliw ikaimik, nain naap wiar opap ike. Iiriw Mua Maneka-ke epa eliwa nain aawe naep nefa fareya, o opor makena wiar ookam-ikain nain wi emeria mua unowa mokok epa-pa ariman maen. 13 Mua Maneka maa muutitik kekanowa wieya mokok enuma ikua, ne Yeesus Krais Pontius Pailat miir onoma-pa balisow akena wame maek. Yo wiam erup nain mokok epa-pa nefa maakiyem, 14 opora ne sira eena Mua Maneka niek nain baliwep wiar ookam-ike, me wiar bilike, ne me wiar puuke. Naeya no sira dubil manekiw ikok yiena Maneka Yeesus Krais nainiw ekapow fofa arewami naap uuwam-ike. 15 Fofa nain pepek ereya Mua Maneka-ke Yeesus ariman wuinon. Kema eliwa onoma Mua Maneka ona, ne pun ona waisow yia urufiya. O wi owow saria unowa nain wiena Saria maneka-ke, ne wi owow mua mane-maneka unowa nain wiena Mua Maneka-ke. 16 Os-ke waisow me uminon. O parin manek akena-pa ikaiya, i wameiya wiar ekowa me pepek. Mua kuisow-ko me urufamik ne o urufowa pun me pepek. Unum maneka ne kekanowa anane naap wiar ikaiya. Makena.

Wi mua maa unow akena wiar ikomakek nain opora-ke

17 Nos-ke neek wia maake, wi mua maamuma maa muutitik unow akena wiar ikomakek nain unuma me wiam piruk, ne wiena maamuma kema manek akena me kema suuwuk. Moram maa nain anane naap me wiar ikainon. Mua Maneka manek akena kema suuwuk, moram os-ke maa unowa yiemi kema eluk naep ona yiomakek. 18 Wi mua naap nain wia maakeya maa muutitik eliwa muutiw onami uuwowa ele-eliwa unowa imenam-ikauk. Me yamunsiaruk, weetak, wiena maa papako sererkap wi mua eena maa marew akena ikemik nain wia asipam-ikauk. 19 Naap onikuan-na ikoka iinan owowa-pa Mua Maneka-ke nain wia kiripomaya anane kema eliw manekiw ikaikuan.

Timoti baliwep wame urufam-ikainok

20 Aria Timoti, no Mua Maneka uuwowa ne opora niek nain baliwep opap name urufami ike. Wi Mua Maneka firekami opor wadola aakunimik ne papako kema sira-sira wuami maimik, “I yookowen-na amis maneka aawowen.” No opora sira naap nain mikikira-pa wue. Opor sira nain Mua Maneka opora wiar iiwuariya nain-ke. 21 Wi papako-ke maimik, “I amis ononaiya yiar ikua,” naap maemi opor makena ookowa uferap iiriw piipuamik.

Mua Maneka ni nia kemalep nia asipam-ikainok.